Juncker snýr aftur


Meinsemd er önnur bókin í bókaröðinni um lögreglumanninn Juncker. Hann er enn í Sandsted þjakaður vegna martraða í kjölfar dauða föður hans. Þegar lögmaður í bænum finnst myrtur í almenningsgarði bæjarins sogast hann inn í umfangsmikla rannsókn sem hefur meðal annars þræði til hans eigin fortíðar.


Í Kaupmannahöfn fær Charlotte konan hans, sem er blaðamaður, nafnlausa vísbendingu: Hægt hefði verið að koma í veg fyrir hryðjuverkaárásina skelfilegu í Kaupmannahöfn hálfu ári fyrr. Charlotte gengur á Juncker sem tók þátt í rannsókninni á hryðjuverkaárásinni en hann neitar með öllu að kannast við neitt slíkt. Hann óttast um líf sitt og Charlotte fari hún að stinga nefinu í málið.



Signe, gamli félagi Junckers í Kaupmannahafnarlögreglunni er tilkippilegri til að aðstoða blaðamanninn en hefur í mörg horn að líta. Hjónaband hennar er komið að fótum fram og hún enn heltekin af hefndarhug gegn manninum sem nauðgaði henni. Þegar í ljós koma tengsl milli hryðjuverkamálsins og líks sem finnst í Kongelunden gefur Signe skít í allt saman og stingur sér út í djúpu laugina í leit að sannleikanum.


Blaðamannahjónin Kim Faber og Janni Pedersen slógu í gegn með fyrstu skáldsögu sinni, Kölduslóð (d. Vinterland) og Meinsemd (d. Satans sommer) er önnur bókin í seríunni og ekki síðri.


Meinsemd fæst alls staðar þar sem góðar bækur fást á Íslandi, þar á meðal hér í vefverslun Kvers.